लुम्बिनी प्रदेशमा स्क्रब टाइफस र डेंगुको संक्रमण बढ्दै गएको स्वास्थ्य निर्देशनालयले जनाएको छ। पछिल्लो नौ महिनामा १२ जिल्लामा स्क्रब टाइफसको शंकामा २ हजार ७८० जनाको परीक्षण गरिएकोमा २३१ जनामा संक्रमण पुष्टि भयो। दाङमा ६२४ जनामा शंका गरिएकोमा ६५ जनामा, पाल्पामा ३९६ मध्ये २२ जना र रूपन्देहीमा २१६ मध्ये १४ जनामा संक्रमण देखियो। डेंगुको शंका गरिएका ८४६ जनामध्ये ८२७ जनामा संक्रमण पुष्टि भयो। पाल्पामा २५१, दाङमा १६३, रूपन्देहीमा १२८, गुल्मीमा ६५ र अर्घाखाँचीमा ४५ जनामा पुष्टि भएको छ। जनस्वास्थ्य अधिकृत ताराबहादुर कार्कीका अनुसार विगतको तुलनामा दुवै रोगको संक्रमण बढेको छ। स्क्रब टाइफस किर्नाको टोकाइबाट र डेंगु एडिस लामखुट्टेबाट सर्छ। जोखिम घटाउन झाडी तथा घाँस सफा राख्न र खेतबारीमा काम गर्दा सावधानी अपनाउन सुझाइएको छ। स्वास्थ्य आपूर्ति व्यवस्थापन केन्द्र, बुटवलले जिल्ला स्वास्थ्य कार्यालयमार्फत परीक्षण किट पठाएको छ।